काठमाडौँ — सर्वोच्च अदालतको फुलकोर्टले जाजरकोटको रामीडाँडालाई केन्द्रबिन्दु बनाएर गएको भूकम्पका पीडितका लागि सहयोग घोषणा गरेको छ । सर्वोच्च अदालतको बुधबार बसेको फुलकोर्टको बैठकले प्रधानन्यायाधीशदेखि जिल्ला अदालतका न्यायाधीश र कर्मचारीको पारिश्रमिकबाट सहयोग रकम उपलब्ध गराउने निर्णय गरेको हो ।

सर्वोच्च अदालतका सहप्रवक्ता गोविन्दप्रसाद घिमिरेका अनुसार प्रधानन्यायाधीश र सर्वोच्च अदालतका न्यायाधीशले ७ दिनको पारिश्रमिक भूकम्प पीडितका लागि उपलब्ध गराउने निर्णय भएको हो । त्यस्तै, उच्च अदालतका न्यायाधीशहरूको ५ दिनको पारिश्रमिक र जिल्ला अदालतका न्यायाधीशको ३ दिनको पारिश्रमिक उपलब्ध गराउने निर्णय गरिएको छ ।

गत शुक्रबार जाजरकोटमा गएको भूकम्पले जाजरकोट र रुकुम पश्चिममा १५३ जनाको मृत्यु भएको थियो भने २ सयभन्दा बढी घाइते भएका थिए । भूकम्पबाट ठूलो संख्यामा घरहरू भत्किएका छन् ।source: ekantipur