काठमाडौं ।प्रतिनिधिसभा बैठक स्थगन भएको छ । संसद्‌को अर्को बैठक बुधबार बिहान ११ बजेका लागि बोलाइएको छ । मंगलबार बसेको प्रतिनिधि सभाको बैठकमा भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने माग बैठक सुरू हुनासाथ माओवादी, रास्वपा र राप्रपाका सांसदहरुले संसद अवरोध गरेका थिए ।आज सुरुमा आधा घण्टाका लागि स्थगन गरिएको बैठक पछि सूचनामार्फत साढे २ बजे बस्ने भनिएको थियो ।

विवादित व्यक्तिलाई अध्यागनमा गरेको सरुवा र गृहमन्त्रीकै रमेश लेखकको निर्देशनमा भिजिट भिसाका नाममा मानवतस्करी भएको आरोप लागेको छ ।भिजिट भिसाको नाममा करोडौं रुपैयाँ लिएर नेपाली युवालाई विदेश उडाउने गरेको घटना सार्वजनिक भएपछि त्यसमा गृहमन्त्रीसमेत संलग्न रहेको आरोप विपक्षीहरूले लगाएका छन् ।

बैठक सुरु हुना साथ विपक्षी दलले गृहमन्त्रीले राजीनामा नदिएसम्म सदन चल्न नदिने बताउँदै नाराबाजी गर्दै विरोध गरेपछि सभामुख देवराज घिमिरेले ३० मिनेटलाई बैठक स्थगित भएको सूचना सुनाए। सहमति नजुटेपछि उनले दिउँसो साढे २ बजेसम्म बैठक स्थगित गरिएको सूचना टाँस्न लगाएर पुनः सहमतिको प्रयास गरेका थिए । त्यसपछि पनि सहमती जुट्न नसकेपछि भोलि बिहानसम्मका लागि वैठक स्थगित गरिएको हो ।

गृहमन्त्री लेखकले आफूमाथि लागेका आरोप निराधार रहेको बताइसकेका छन् । उनको पार्टी नेपाली कांग्रेसले पनि गृहमन्त्रीले राजीनामा दिनुनपर्ने निष्कर्ष निकालिसकेको छ ।