काठमाडौँ । इङल्याण्डको विश्व टेस्ट च्याम्पियनसिपमा २ अंक घटेको छ ।

लर्ड्समा भारतविरुद्धको तेस्रो टेस्ट खेलमा स्लो ओभर रेटका कारण दुई अंक कटौती भएसँगै अब विश्व टेस्ट च्याम्पियनसिपमा तेस्रो स्थानमा झरेको छ । बेन स्टोक्सको नेतृत्वमा रहेको इङल्याण्डलाई स्लो ओभर रेटका कारण म्याच शुल्कको १० प्रतिशत जरिवाना पनि लगाइएको छ । यो खेलमा इङल्याण्डले भारतलाई २२ रनले पराजित गरेको थियो ।

आइसीसीका अनुसार, म्याच रेफ्री रिची रिचर्डसनले इङल्याण्डलाई यो जरिवाना लगाएका हुन् ।

यो कारवाहीपछि इङल्याण्ड स्कोर २४ बाट घटेर २२ मा झरेको छ भने अंक प्रतिशत ६६.६७ प्रतिशतबाट घटेर ६१.११ प्रतिशतमा झरेको छ । श्रीलंकाले यसको फाइदा उठायो, जसको प्रतिशत ६६.६७ छ र यो इङल्याण्डलाई उछिन्दै दोस्रो स्थानमा पुगेको छ । अष्ट्रेलिया अहिलेसम्म आफ्ना तीनवटै खेल जितेपछि १०० प्रतिशत अंकका साथ तालिकाको शीर्षमा छ, जबकि भारतको अंक प्रतिशत ३३.३३ छ ।